Жорий йил ҳосилидан жамғарилган уруғлик доннинг сифатли сақланиши таъминланмоқда

Жорий йилда ўтказилган дала апробация кўригида яроқли деб топилган 66 минг 235 гектар уруғлик ғалла майдонларидан кузги юмшоқ буғдойнинг 65 та селекцион навидан 211,4 минг тонна уруғлик дон қабул қилинган.

Жамғарилган уруғликларнинг 1,5 минг тоннаси 2 йил кўпайтириш кўчатзори, 25,3 минг тоннаси Оригинал, 114,9 минг тоннаси Элита ва 69,7 минг тоннасини Р-И авлодли уруғликлар ташкил қилган.

Ушбу уруғликлар 114 та уруғчилик субъектлари (Дон корхона, кластер, Уруғчиликни ривожлантириш марказига қарашли уруғлик цехлари, ЭУХ, ИТИ ва бошқалар) га қарашли 120 та омбор ҳамда масканларига нав ва авлодлар бўйича алоҳида 735 та тўда (партия)ларга жамғарилган.

Жумладан, «Ўздонмаҳсулот» АК тизимидаги 25 та дон корхоналарининг 41 та шохобчаларида 105,6 минг тонна, уруғчиликка ихтисослашган 21 та кластер ҳамда хусусий уруғчилик корхоналарида 34,2 минг тонна, Уруғчиликни ривожлантириш марказига қарашли 18 та уруғлик цехларида 64,1 минг тонна, 22 та Элита уруғчилик хўжаликларида 5,7 минг тонна ва 9 та Илмий тадқиқот муассасаларида 1,7 минг тонна авлодли уруғликлар жамғарилган.

Ушбу жамғарилган уруғликларни ҳозирда Инспекциянинг ҳудудий бошқармалари ва туман бўлимларининг уруғчиликни назорат қилиш бўйича мутахассислари томонидан сифатли сақланиши назоратга олинган.

Ш.Жуманов, Инспекциянинг Қишлоқ хўжалиги экинлари уруғлари етиштирилишини назорат қилиш бошқармаси