“Ўзагроинспекция”нинг Риштон туман бўлими томонидан 16 нафар фермер хўжаликларининг ҳуқуқларини тикланиши таъминланди

Агросаноат мажмуи устидан назорат қилиш инспекцияси Риштон туман бўлими томонидан тумандаги “Ихтиёр СМИК” номли фермер хўжалиги раҳбари М.Ахмедова ва бошқаларнинг Инспекцияга амалий ёрдам сўраб қилган мурожаати ўрганиб чиқилди.

Мурожаатда 2022 йил пахта ҳосилини тумандаги “РусЎзбектекс” МЧЖ пахта тўқимачилик кластер корхонасига шартнома асосида етказиб берилганлиги ва ушбу кластер корхонаси томонидан пахта хом-ашёсини намлик ва ифлослик учун чегириб ташлангандан кейин ҳам, қуритиш ва тозалаш ҳамда умумий тоннадан 0.5 фоиз чегирма маблағлари ушлаб қолинаётганлигидан норозиликлари баён этилиб, ноқонуний ушлаб қолинган пул маблағларини фермер хўжалиги ҳисобига қайтариб берилишида амалий ёрдам сўралган.

Инспекциянинг Риштон туман бўлими томонидан 2022 йил давомида фермер хўжаликларининг «РусЎзбектекс» МЧЖ пахта тўқимачилик кластер корхонаси билан тузилган контрактация шартномаларига асосан етказиб берилган пахта хом-ашёси миқдори, кондицион вазнини ҳисоблашда топширилган пахтанинг намлик ва ифлослиги бўйича қўлланилган чегирмалар, қуритиш ва тозалаш ҳамда умумий тоннадан 0.5 фоиз чегирма маблағлари ушлаб қолинганлиги бўйича барча маълумотлар таҳлил қилинди.

Ўрганиш натижаси бўйича «РусЎзбектекс» МЧЖ пахта тўқимачилик кластер корхонаси томонидан “Ихтиёр СМИК” фермер хўжалиги ва бошқа фермер хўжаликлари томонидан етказиб берилган пахта хом-ашёси ва унинг учун ҳисобланган чегирма маблағлари қайта ҳисоб-китоб қилиниши бўйича кўрсатмалар берилди.

Шунингдек, мурожаатдаги «РусЎзбектекс» МЧЖ пахта тўқимачилик кластер корхонаси томонидан шу кунга қадар тўланмай келинаётган 16 та фермер хўжаликларининг уруғлик чигити учун 925.000.000 (тўққиз юзи йигирма беш млн) сўм миқдордаги пул маблағлари “Ихтиёр СМИК” фермер хўжалиги ва бошқа хўжаликларнинг ҳисоб-рақамларига ўтказиб берилиши таъминланди.

 “Ўзагроинспекция” нинг Риштон туман бўлими томонидан ушбу йўналишда назорат тадбирларининг ўтказилиши давом эттирилмоқда        

 "Ўзагроинспекция" Риштон тумани бўлими