Ҳудудларда кузги шудгорлаш ишларини сифатли ўтказилиши «Ўзагроинспекция» назоратида

Бободеҳқонларимиз томонидан “Ер ҳайдасанг куз ҳайда, куз ҳайдамасанг юз ҳайда” деб бежиз айтишмаган.

Қишлоқ хўжалигида мўл ҳосил етиштиришда кузги шудгорлашнинг аҳамияти катта. Ўз вақтида, сифатли ўтказилган шудгор келгуси йил ҳосилига пухта замин яратади.

Республика ҳудудларида 2025 йил ҳосили учун 1 млн. 240 минг гектар майдонда кузги шудгорлаш ишлари амалга оширилиши белгиланди.

Ушбу тадбирга жорий йилда жойларда 5814 дона ҳайдов тракторлари жалб қилинган.

Инспекциянинг ҳудудий бошқармалари ва туман бўлимлари томонидан ҳудудларда шудгорлаш ишларини сифатли амалга оширилиши бўйича кунлик назорат ўрнатилди.

Бунда аввалам бор, шудгорлаш сифатига, шунингдек, белгиланган чуқурликда, дала боши ва охири ҳайдалганлигига ва ҳар бир контурнинг тўртбурчак, яъни «конверт» қилиб, симёғоч ва дарахтлар атрофини тўлиқ шудгорланишига эътибор қаратилди.

Хусусан, бугунги кунда ҳудудларда 9 010 та назорат тадбирлари ўтказиб, назорат тадбирлари давомида 8 минг 713 та фермер хўжаликларининг 73,5 минг гектар ер майдонларида шудгорлаш ишларида камчиликлар аниқланди.

Жумладан, жойлардаги 2206 та фермер хўжаликларининг 10,6 минг гектар майдонида тўлиқ контур ҳосил қилмасдан шудгор қилинганлиги, 849 та фермер хўжаликларининг 4,9 минг гектар майдонида сифатсиз шудгор қилинганлиги, 649 та фермер хўжаликларининг 3,5 минг гектари саёз шудгор қилинганлиги, 3886 та фермер хўжаликларининг 44 минг гектар майдонида фосфорли минерал ўғитларсиз шудгор қилинганлиги, 1176 та фермер хўжаликларининг 10 минг гектар майдонида чимқирқарсиз омочлар билан шудгор қилинганлиги аниқланди.

Юқорида қайд этилган камчиликларни бартараф қилиш юзасидан, соҳа масъулларига 197 та тақдимнома, шунингдек фермер хўжаликларига 8267 та огоҳлантиришлар ҳамда 546 та ёзма кўрсатмалар берилди.

Қишлоқ хўжалигида агротехник тадбирлар ўтказилишини назорат қилиш бўлими