Қишлоқ хўжалиги: баҳорги мавсум тараддуди

Қишлоқ хўжалиги соҳаси ходимлари учун йил ўн икки ой иш топилади. Бинобарин, қиш фасли ҳам улар учун масъулиятли давр ҳисобланади. Яъни, баҳорги дала ишларида техникаларни мавсумга соз ҳолга келтириш айни қиш мавсумида олиб борилади.

Хўш, Наманган вилоятида 2025-йил баҳорги дала ишларида қишлоқ хўжалиги техникаларини таъмирлаш ишлари қандай кетмоқда?Бу ҳақида ЎзА мухбирига Вазирлар Маҳкамаси ҳузуридаги Агросаноат мажмуи устидан назорат қилиш инспекцияси Наманган вилояти бошқармаси шўъба бошлиғи Абдуқаҳҳор Акбаров қуйидагиларни маълум қилди.

– Жорий йил баҳорги дала ишларида қатнашадиган қишлоқ хўжалиги техникаларини белгиланган муддатларда, сифатли таъмирланишини таъминлаш мақсадида дислокациялар ишлаб чиқилди. Унга кўра 46 та таъмирлаш масканлар ишлари ташкил этилди. 1 минг 244 та чопиқ трактори, 1 минг 244 та культиватор, 470 та чигит экиш сеялкаси, 2 минг 416 та тишли борона, 402 та чизел мосламаси, 278 та пушта олиш мосламаси, 271 та ер текислагич, 278 та ОВХ пуркагич, 342 та минерал ўғит сепкич ва 243 та дон ўриш комбайни қатнашиши режалаштирилган.

Мавсумда иштирок этадиган қишлоқ хўжалиги техника ва машиналарни ҳолатлари мутахассислар томонидан бирма-бир ўрганиб чиқилиб, носозларини таъмирлаш учун талаб этиладиган эҳтиёт қисмлар ҳамда пул маблағлари аниқлаб олинди.

Барча таъмирлаш масканларида таъмирдан чиқарилиб, мавсумга шай ҳолатга келтирилган техникаларни туман комиссиялари томонидан қайта кўриб чиқиш, мавжуд камчиликларни бартараф этган ҳолда қабул қилиб сертификат бериш ишларини бориши “Ўзагроинспекция” вилоят бошқармаси ва туман бўлимлари томонидан назоратга олинди.  

Қолаверса, жойларда мавсум ишларига жалб этилаётган ҳар бир қишлоқ хўжалиги техникалари ва машина механизмларни Вазирлар Маҳкамасининг 2023-йил 29-апрелдаги тегишли қарори билан тасдиқланган низом талаблари асосида инспекция органларида қайта рўйхатдан, йиллик техник кўрикдан ўтказилганлиги, шунингдек, механизаторларни тракторчи-машинист гувоҳномаларини тоифалари бошқарувидаги техникаларни бошқаришга рухсат бериши ҳамда гувоҳномаларини, техник ҳужжатларни янги намунадаги пластик шаклдаги ҳужжатларга алмаштирилганлиги алоҳида назоратга олиниб мулк эгалари ва механизаторлар ўртасида қарор ижроси юзасидан ташвиқот ишлари олиб борилмоқда.

Наманган вилоятида қишлоқ хўжалигини техникалар билан таъминланганлиги даражаси таҳлил қилинганда, ҳайдов тракторлари 117 фоиз, чопиқ тракторлари 127 фоиз, культиваторлар 127 фоиз, чигит экиш сеялкалари 112 фоиз, ер текислагичлар 139 фоиз, пушта олиш мосламалари 109 фоиз, дон ўриш комбайнлари 110 фоизга таъминланган бўлса, чизеллар 82 фоизга, тишли бороналар 66 фоизга таъминланган.

Ўтган йил давомида хизмат муддатини ўтаган, иш унумдорлиги паст техникалар ўрнига янги юқори унумли техникалар билан таъминлаш мақсадида, вилоят “Агролизинг” компанияси томонидан вилоятдаги 665 субъект билан 812 та 85,6 миллиард сўмлик қишлоқ хўжалик техникаларининг лизинг шартлари асосида етказиб бериш юзасидан шартнома тузилиб, Уйчи туманига 127 та, Учқўрғон туманига 103 та, Мингбулоқ туманига 102 та, Косонсой, Норин, ва Поп туманларига 97 тадан, Наманган туманига 71 та, Чуст туманига 45 та, Тўрақўрғон туманига 34 та, Чортоқ туманига 28 та ҳамда Янгиқўрғон туманига 5 та қишлоқ хўжалиги техникаси етказиб берилди.

Вилоятда 2025-2029 йилларда техникалар сотиб олиш бўйича ишлаб чиқилган дастурга кўра, техника паркларни янгилаш ва уларни замонавий, юқори унумли ва иқтисодий тежамкор техникалар билан таъминлаш ишлари жорий йилда ҳам изчил давомида эттирилиб, 720 та умумий қиймати 318 миллиард 40 миллион сўмлик қишлоқ хўжалиги техникаларини сотиб олиш режалаштирилган.