2025-йил ҳосили учун парвариш қилинаётган уруғлик ғалла майдонларида агротехник тадбирларни ўз вақтида ва сифатли амалга оширилиши “Ўзагроинспекция” томонидан доимий назорат қилиб борилмоқда.
2025-йил ҳосили учун экилган уруғлик ғалла майдонларида белгиланган тартибда агротехник тадбирларни сифатли қилиб ўтказилганлиги ҳамда уруғлик ғалла майдонларининг бугунги кундаги ҳолати Инспекциянинг уруғчилик йўналишидаги вертикал тизими мутахассислари ва “Уруғчиликни ривожлантириш маркази” ходимлари ҳамда туман қишлоқ хўжалиги бўлимлари мутахассисларидан иборат ишчи гуруҳлар тузилиб, уруғлик майдонларда 1-мониторинг тадбири ўтказилди.
Ўтказилган мониторинг натижаларига кўра, 2 минг 913 та субъектлар томонидан жами 79 минг 755 гектар майдонларда экилган уруғлик ғалла тўлиқ униб чиққан бўлиб, бугунги кунда туплаш фазасида ривожланмоқда.
Илмий тадқиқот институтлари олимларининг берган тавсияларига асосан тупроқ иқлим шароитини ҳисобга олган уруғлик ғалла майдонларида февраль ойида гектарига 200 кг дан (физик ҳолда) азотли минерал ўғитлар билан озиқлантириш кераклиги белгиланган бўлиб, бугунги кун ҳолатида 58 минг 611 гектар майдонларда ёки 73,3 фоизида озиқлантириш ишлари бажарилган.
Бугунги кунда, уруғлик ғалла майдонларида минерал ўғитлар билан озиқлантириш ишлари Навоий, Наманган, Самарқанд, Сурхондарё ва Фарғона вилоятларида тўлиқ якунланган.
Шунингдек, азотли минерал ўғитлар билан озиқлантирилган уруғлик ғалла майдонларининг 55 фоизида пешма-пеш суғориш ишлари амалга оширилганлиги маълум бўлди.
Ҳудудларда тузилган ишчи гуруҳлар томонидан ўтказилган 1-мониторинг тадбири давомида 25 та субъектларнинг 367 гектар уруғлик ғалла майдонлари талаб даражасида агротехник тадбирлар бажарилмаганлиги ҳамда тўлиқ униб чиқмаганлиги ва энг Асосийси авлоди паст бўлган уруғликлар экиб юборилганлиги учун уруғлик етиштирувчилар таркибидан чиқарилди.
Ҳудудлардаги уруғчилик соҳаси мутахассислари томонидан мавсум давомида уруғлик ғалла майдонларида ўтказиладиган агротехник тадбирлар ва мониторинг ишлари доимий назоратга олинган ҳамда аниқланган камчиликларни жойида бартараф этиш юзасидан тегишли чоралар белгиланган.
Қишлоқ хўжалиги экинлари уруғлари етиштирилишини назорат қилиш бошқармаси
