Ҳосил салмоғи нав сифатига боғлиқ. Жиззахда шу мавзуда семинар ташкил этилди

Jizzax viloyatida 2020 yil urugʼlik uchun ekilgan gʼoʼza maydonlarida aprobatsiya oʼtkazish va sifatli urugʼlik jamgʼarmasini yaratishga bagʼishlangan seminar tashkil etildi. Mintaqaviy tarzda uyushtirilgan tadbir dastlab Doʼstlik tumanidagi “Baxtiyorbek” urugʼchilik fermer xoʼjaligi dalasida oʼtkazildi. Unda Аrnasoy, Doʼstlik va Mirzachoʼl tumanlarining qishloq xoʼjaligi tashkilotlari va korxonalari, ilmiy tajriba va ishlab chiqarish markazlari mutasaddilari, urugʼchilik fermer xoʼjaliklari rahbarlari, klasterlar agronomlari hamda “Oʼzagroinspektsiya” ning Jizzax viloyat boshqarmasi va tuman boʼlimlari xodimlari, “Аgrosanoat majmuida xizmatlar koʼrsatish markazi” DUK mutaxassislari ishtirok etishdi.

Tadbir davomida “Gʼoʼza navdorligini aniqlash boʼyicha aprobatsiya oʼtkazish va hujjatlarni rasmiylashtirish tartibi toʼgʼrisida”, “Gʼoʼza navlarini toʼgʼri joylashtirish va sifatli urugʼlik jamgʼarmasini yaratishda gʼoʼza aprobatsiyasining maqsad va vazifalari”, 2020 yil mavsumida urugʼlik paxtani qabul qilish va xoʼjaliklarni sara urugʼ bilan taʼminlash borasida paxta tozalash korxonalarida tayyorgarlik ishlarining borishi kabi sohadagi dolzarb masalalar yuzasidan atroflicha maʼlumotlar berildi. Qayd etilganidek, har yili paxta yetilishi davrida urugʼlik uchun ekilgan gʼoʼza maydonlarining navdorligiga baho beriladi. Gʼoʼza aprobatsiyasiga oid qoʼllanmaga koʼra, aprobatsiya oʼtkazish davrida urugʼlik fondini yaratish uchun kasalliklar va zararkunandalarga chalinmagan, mahsuldor, nav tozaligi yuqori boʼlgan dalalar tanlanadi.

- Апробация жараёнида уруғлик майдонларида кутилаётган ялпи ҳосил, уруғлик пахта миқдори, нав тозалиги, касалликлар билан зарарланиш даражаси аниқланади, -дейди “Ўзагроинспекция” нинг Жиззах вилоят бошқармаси бош инспектори Ўрол Қаршибоев. - Уруғлик учун экилган майдонларда ғўзалар вилт, (вертициллиоз, фузариоз), гоммоз касалликлари ҳамда қишлоқ хўжалик зараркунандалари билан зарарланган, кам ҳосилли, чанқатиб қўйилган, ривождан орқада қолган тақдирда ушбу майдонлар тегишлича ҳужжатлаштириб, апробация ўтказиш режасидан чиқарилади.

Шунингдек, Пахтакор туманида Зарбдор, Зафаробод ва Шароф Рашидов ва Пахтакор туманларида фаолият кўрсатаётгани уруғлик фермер хўжаликлари ва кластерлар учун ўтказилган семинарда ҳам уруғлик ғўза майдонларида апробация ўтказишнинг тартиб тамойиллари, мазкур тадбирга бириктирилган комиссия аъзолари ва уруғлик хўжаликлари раҳбарлари олдига қўйилган қатъий талаблар етказилди. Таъкидланишича, вилоят бўйича 2020 йил ҳосили учун тендер асосида танлаб олинган 277 та фермер хўжалигининг жами 7,5 минг гектар майдонида уруғлик пахта етиштирилмоқда. Жумладан, 2,7 минг гектарга «Султон», 2,5 минг гектарга «Бухоро-102”, 1,0 минг гектарга «Ан-Баявут-2», 1,0 минг гектарга “С-6524», 115,0 гектарга “Генофонд-2” ҳамда 6,0 гектарга “УзФА-713” ва 30,0 гектарга “УзФА-707” каби янги навлар экилган.

Семинар якунида август ойи ҳосил тақдирини ҳал этадиган ой экани яна бир бор таъкидланиб, фермерларимиз ҳар бир дақиқани ғанимат билган ҳолда виждонан ва шижоат билан ишлаш кераклиги уқтирилди. Уруғлик пахта экилган майдонларда апробацияни қонун талаблари асосида ўз муддатида сифатли амалга ошириш бўйича масъулларга зарур тавсиялар берилди.

"Ўзагроинспекция" Жиззах вилоят бошқармаси Ахборот хизмати