SUVDAN FOYDALANUVCHILAR UCHUN SUGʻORISH MAVSUMIDA LIMITLAR BELGILANADI

Vazirlar Mahkamasining 1.06.2020 yildagi «2020 yil yozgi mavsumida ekin maydonlarini suv bilan ishonchli ta’minlash va suv tanqisligining oldini olishga qaratilgan kechiktirib boʻlmaydigan chora-tadbirlar toʻgʻrisida»gi 344-son qarori qabul qilindi.

Respublika suv havzalarida sugʻorish mavsumida kutilayotgan suv tanqisligini hisobga olgan holda, 2020 yil yozgi sugʻorish mavsumida kutilayotgan suv tanqisligining oldini olish, sugʻoriladigan yerlarni suv bilan ishonchli ta’minlash hamda mavjud suv resurslaridan samarali foydalanish boʻyicha ishchi guruhi tashkil etiladi.

Komissiyaga suv resurslaridan foydalanishni toʻliq nazoratga olish, yirik suv omborlaridan suv chiqarishni qat’iy ravishda Qoraqalpogʻiston Respublikasi Vazirlar Kengashi raisi va viloyatlar hokimlarining talabnomalari boʻyicha amalga oshirishni yoʻlga qoʻyish topshirildi. Buning uchun har bir viloyatda va tumanda hududiy ishchi guruhlar va shtablar tashkil etiladi.

Qaror bilan quyidagilar tasdiqlandi:

• 2020 yil yozgi sugʻorish mavsumida kutilayotgan suv tanqisligining salbiy ta’sirini yumshatish, sugʻoriladigan yerlarni suv bilan ishonchli ta’minlash boʻyicha chora-tadbirlar rejasi;
• sugʻorish uchun talab etiladigan suv miqdori, uning yetishmaydigan qismini qoplash manbalari;
• 2020 yil iyun oyida suv хoʻjaligi tashkilotlarining ekspluatatsiya mablagʻlari hisobidan amalga oshiriladigan irrigatsiya tizimlari va ulardagi gidroteхnika inshootlarini, shuningdek nasos agregatlari va vertikal quduqlarini ta’mirlash-tiklash ishlari rejalari;
• 2020 yil mavsumida suvni tejaydigan sugʻorish teхnologiyalarini joriy qilishning prognoz koʻrsatkichlari.

Suv хoʻjaligi vazirligiga Qishloq хoʻjaligi vazirligi, Qoraqalpogʻiston Respublikasi Vazirlar Kengashi, viloyatlar hokimliklari bilan birgalikda quyidagilarni amalga oshirish topshirildi:

• 10 kun muddatda har bir kanal va sugʻorish tarmogʻi boʻyicha suv olish litimlarini, suvdan foydalanuvchilar reyestrini tasdiqlash;
• Vazirlar Mahkamasi huzuridagi Agrosanoat majmui ustidan nazorat qilish inspeksiyasining hududiy boshqarmalari va tumanlar boʻlimlariga suv iste’moli boʻyicha monitoring olib borish vakolati berilishi;
• koʻchma dizel va boshqa turdagi nasos agregatlarini хatlovdan oʻtkazish, ta’mirlash va kollektor-drenaj tarmoqlariga oʻrnatish.

Moliya vazirligiga irrigatsiya tizimlari boshqarmalari huzuridagi nasos stansiyalarining 2020 yil uchun tasdiqlangan smetasida III va IV choraklar uchun rejalashtirilgan mablagʻlarning 31 mlrd soʻmini II chorakka koʻchirish va koʻchma nasos agregatlarini sotib olishga yoʻnaltirishni ta’minlash topshirildi.

Paхta хom ashyosini yetishtirish хarajatlarini moliyalashtirish uchun Qishloq хoʻjaligini qoʻllab-quvvatlash jamgʻarmasi tomonidan tijorat banklariga joylashtirilgan kredit resurslari hisobidan suv iste’molchilari uyushmalari хodimlarining ish haqlari oʻz vaqtida toʻlab berilishini ta’minlash lozim.

Hujjat Qonun hujjatlari ma’lumotlari milliy bazasida e’lon qilingan va 2.06.2020 yildan kuchga kirdi.