Bosh vazir kubogi boshlandi, Agroinspeksiya jamoasi keyingi bosqichda!

Jismoniy tarbiya va sport vazirligi tashabbusi bilan vazirliklar, idoralar, xo‘jalik birlashmalari, yirik korxona va tashkilotlarning markaziy apparati xodimlari o‘rtasida futbol bo‘yicha “Bosh vazir kubogi-2021” musobaqalari tashkil etilayotgani haqida xabar bergan edik. 

Bugun “Bunyodkor” futbol akademiyasi mashg‘ulot maydonlarida bo‘lib o‘tayotgan futbol musobaqalariga  start berildi va 1/32 final bosqichi uchrashuvlari yakuniga ko‘ra  keyingi bosqichga yo‘l olgan barcha jamoalar nomi maʼlum bo‘ldi.

“O‘zagroinspeksiya” jamoasi  “Davstatqo‘m”ga qarshi o‘yinda matonat ko‘rsatdi. O‘yinning ilk daqiqalarida 0:1 hisobi bilan ortda qolayotgan inspeksiya jamoasi oradan hech qancha o‘tmay hisobni tenglashtirdi va murosasiz kechgan o‘yin davomida raqiblari darvozasini jami olti marta ishg‘ol qilib, 6:3 hisobi bilan o‘yinni o‘z foydalariga hal qilishdi.

Jamoaga g‘alaba muborak bo‘lsin!

Ertangi bo'ladigan uchrashuvda Agroinspeksiya Qishloq xo‘jaligi vazirligi bilan kuch sinashadi.

“O‘zagroinspeksiya” Axborot xizmati